أكد عضو لجنة التخطيط في نادي الزمالك، أحمد حسام “ميدو”، أن الكرة المصرية وصلت إلى الحضيض، ومليئة بالفساد والمجاملات، وذلك بعد خسارة منتخب مصر أمام المغرب في نصف نهائي كأس الأمم الأفريقية للشباب.
قال ميدو عبر حسابه الرسمي على إكس: “أداء منتخب مصر للشباب أداء حزين خلال بطولة كأس الأمم الأفريقية وهو نتاج طبيعي لإهمال المسؤولين عن كرة القدم في مصر عن أساس كرة القدم الملاعب الجيدة وتسليح المدربين بعلم التدريب الحديث، أضف إلى ذلك المجاملات في اختيار المدربين واللاعبين على حساب لاعبين ومدربين أفضل ومعظم الإعلاميين يجاملوا المنظومة بالكامل لوجود مصالح متبادلة بينهم!!، وصلنا إلى الحضيض والقاع في كرة القدم..خسارة بلد عندها كل الإمكانيات أنها يكون عندها على الأقل 70 أو 80 لاعب يلعبوا في أوروبا، ولكن التفكير العقيم وعدم وجود أي تخطيط وصلنا لما وصلنا إليه!! ولسه!!!”.
وأضاف: “أحلى حاجة أن بعض الإعلاميين والمسؤولين بيعتبوا على الجمهور ليه مابيروحوش ماتشات المنتخبات فاكرين الجمهور عبيط ومش دريان بكم الفساد والمجاملات اللي موجود في الكورة في مصر اللي أنتوا ماتعرفهوش أن عندنا جيل جديد بالكامل غير مهتم بمتابعة الدوري المصري من الأساس ومابيتفرجش عليه ولا مهتم بأخباره ولا يعرف أسامي اللاعبين اللي بتلعب في المنتخب من الأساس إلا اتنين أو ثلاث لاعيبه”.
واختتم: “نظام إدارة كرة القدم في مصر عين عيال ملطوطة في مناصب مهمة غير مؤهلين علشان تعرف تتحكم فيهم وفي قراراتهم علشان تعرف تجامل اللي أنت عايزه والنتيجة دوري فاشل ومن سيء إلى أسوأ ومنتخبات ضعيفة مافيهاش ولا لاعيب هيكمل ويلعب منتخب أول ومدربين مالهومش أي علاقة بعلم التدريب الحديث وجمهور معظمه مشحون في أتوبيسات تبع أحزاب سياسية وإعلاميين بيطبلوا للاعيبه بعينهم علشان ولاد ناس مهمين وكورة بصراحة معفنة مالهاش أي علاقة بالكورة اللي بنتفرج عليها في كل حتة في العالم”.
