استغل فترة حظر كورونا ونزل الدائرة الهندسية للجيش للشوارع حفر القاهرة كلها وترسها جسور العمل مستمر 24 ساعة غير ملامح المدينة كلها واختصر المسافات بين المناطق الي چانت تاخذ ساعات من الناس والناس يتندرون يسمون القاهرة بلد المليون كوبري ( جسر ) الشوارع تبليط على اعلى مستوى وكل شارع صار عرضه 100 متر … اراضي كان مالها قيمة عمرها وصارت احياء راقية العالم صارت تتسابق حتى تتملك بيهة .. اسس شركة تابعة للجيش سموها Circle فتحت سلسلة كافيهات مكانها تحت الجسور .. وكل الفضاءات الي تحت الجسور تأجرت محلات وكافيهات بمبالغ خيالية شهرياً تذب دخل للدولة …اسس شركة تابعة للجيش ايضاً بدلت كل محطات البانزين وصارت محطات عصرية تزهي وكل محطة بيهة سوبرماركت وحمامات ووكالة اطارات ومحطة غسل وتشحيم .. الكومباوندات السكنية مالها عدد صحاري باطراف القاهرة صارت مجمعات سكنية يحلم الاوربي يسكن بيهة والاراضي الي حولها صارت بالمليارات … حتى يحل ازمة السكن بنى مجمعات سكنية وابراج خرافية تدفع مفدم تافه والاقساط على عشرين سنة والقسط ما يتعدى ال500 جنيه شهرياً وكسر بيهة سوق العقار …المناطق العشوائية كلها هدمها عمارات سواها وية الارض وبناها مجمعات حضارية وعوض اهل العشوائيات بمجمعات سكنية بالاطراف … والقاهرة بعد افتتاح العاصمة الادارية الجديدة لن تكون القاهرة الي قبل هذا وراح يسوي طفرة بالمدينة … العمل قائم على انشاء قطار فائق السرعة يربط المدن المصرية شراكة مع شركات المانية … ترس المدينة رادارات وكاميرات ذكية ترصد المخالفات من عدم ربط الحزام والسرعة العالية واستعمال الهاتف اثناء السياقة باللحظة توصلك صورتك اثناء المخالفة ومبلغ الغرامة على التليفون والغرامات توصل بالالاف … المقابر والابنية القديمة كلها تسيجت بسياجات حجرية على الطراز الفاطمي وصار منظرها يزهي … كل البنايات التراثية تعمرت من جديد وصارت معالم اثرية سياحية .. الخطة القادمة هي اعمار مناطق القاهرة القديمة وتحويلها الى مناطق سياحية بالكامل ومنع التكاتك وعربات الخيول من السير داخلها .. الرجل يريد يخلد اسمه بالبناء … البارحة كنت بشارع عباس العقاد هذا مثل الكرادة ماكو محل تفوته اذا مو مليان زباين حسرة بگلبي اشوف ابو محل صافن .. المطاعم الشعبية والراقية مابيهة محط رجل والناس الي تنتظر مكان اكثر من الناس الگاعدة … لا يابة حكم العسكر موزين … حكم الموامنه احسن اهم شي نزور براحتنا .